ໄຟປ່າ, ອຸບັດເຫດ ແລະ ໄພທຳມະຊາດໃນປະເທດຕ່າງໆ
ຕາມຂ່າວສານ PT ຂອງອິນເດຍ ລາຍງານໃນວັນທີ 2 ມັງກອນວ່າ ເກີດອຸບັດເຫດທາງຄົມມະນາຄົມ ຢູ່ທາງພາກເຫນືອຂອງປະເທດນີ້ ທ່າມກາງ ນ້ຳຫມອກ ປົກຄຸມເບິ່ງບໍ່ເຫັນ, ໂດຍລົດບັນທຸກນັກຮຽນ ຕຳກັບລົດບັນທຸກສິນຄ້າ ເຮັດໃຫ້ນັກຮຽນ ອາຍຸລະຫວ່າງ 5-8 ປີ ເສຍຊີວິດ 10 ຄົນ, ໄດ້ຮັບບາດເຈັບ 20 ຄົນ.
ມື້ດຽວກັນ, ເຈົ້າຫນ້າທີ່ລາຍງານວ່າ ມີຜູ້ເສຍຊີວິດ 17 ຄົນ ຈາກການດື່ມເຫລົ້າເຖື່ອນ ຢູ່ທາງພາກໃຕ້ຂອງອິນເດຍ ຫລັງກ່ອນຫນ້ານີ້ ມີຜູ້ເສຍຊີວິດຈາກ ສາເຫດ ດຽວກັນເຖິງ 170 ຄົນ ເມື່ອ 2-3 ອາທິດກ່ອນ. ເຈົ້າຫນ້າທີ່ລະບຸວ່າ ມີຜູ້ເສຍຊີວິດ 15 ຄົນໃນລັດອານທອນປະເທດ ເມື່ອໄລຍະປີໃຫມ່ທ້າຍອາທິດແລ້ວນີ້ ແລະ 2 ຄົນ ໃນວັນທີ 2 ມັງກອນນີ້.
ທີ່ມາເລເຊຍ: ເຈົ້າຫນ້າທີ່ກູ້ໄພຂອງມາເລເຊຍ ລາຍງານໃນວັນທີ 3 ມັງກອນນີ້ວ່າ ສະຖານະການນ້ຳຖ້ວມໃນເມືອງເບຊຸດ ແລະ ເມືອງເຊຕູ ໃນລັດຕຣັງການູ ເລີ່ມ ດີຂຶ້ນ, ປະຊາຊົນ 407 ຄົນ ທີ່ຍົກຍ້າຍກ່ອນຫນ້ານີ້ ສາມາດເດີນທາງກັບບ້ານໄດ້ແລ້ວ, ຍັງເຫລືອຈຳນວນຫນຶ່ງທີ່ອາໄສຢູ່ສູນພັກຊົ່ວຄາວປະມານ 151 ຄົນ. ປະ ຈຸບັນ ເສັ້ນທາງຄົມມະນາຄົມທຸກສາຍໃນລັດດັ່ງກ່າວ ສັນຈອນໄປມາໄດ້ອີກເທື່ອຫນຶ່ງ ເນື່ອງຈາກນ້ຳແຫ້ງລົງ ແລະ ຝົນບໍ່ຕົກເມື່ອວັນທີ 1 ມັງກອນ. ສ່ວນໃນລັດ ກລັນຕັນ, ປະລິສ ແລະ ຢາໂຊ ກໍເລີ່ມດີຂຶ້ນເຊັ່ນດຽວກັນ. ພື້ນທີ່ 4 ລັດ ຂອງ ມາເລເຊຍ ຖືກນ້ຳຖ້ວມ ເນື່ອງຈາກຝົນຕົກຫນັກໃນວັນຂຶ້ນປີໃຫມ່, ຖະ ຫນົນ ຫລາຍ ສາຍຖືກນ້ຳຖ້ວມສູງສັນຈອນໄປມາບໍ່ໄດ້ ແຕ່ບໍ່ມີຜູ້ເສຍຊີວິດ ຫລືຫາຍສາບສູນ.
ທີ່ເຄນຢາ: ເຈົ້າຫນ້າທີ່ກູ້ໄພ ລາຍງານວ່າ ເກີດອຸບັດເຫດເຮືອໂດຍສານຂອງເຄນຢາຂວ້ຳໃນມະຫາສະຫມຸດ ອິນເດຍ , ໃນບໍລິເວນໃກ້ຊາຍແດນ ໂຊມາລີ ຫລັງ ຈາກຕຳກັບເຮືອອີກລຳຫນຶ່ງ ເມື່ອຄືນວັນທີ 1 ມັງກອນ, ເຮັດໃຫ້ມີຜູ້ເສຍຊີວິດ 7 ຄົນ, ສາມາດຊ່ວຍເຫລືອ ຫລືລອຍຂຶ້ນຝັ່ງໄດ້ເອງປະມານ 50 ຄົນ, ຫາຍສາບສູນ ກວ່າ 20 ຄົນ ເນື່ອງຈາກການກູ້ໄພພົບຄວາມຫຍຸ້ງຍາກລຳບາກ ຍ້ອນລົມແຮງ. ເຮືອລຳນີ້ບັນທຸກຜູ້ໂດຍສານທັງຫມົດ 80 ຄົນ.
ທີ່ຊີເລ: ວັນທີ 2 ມັງກອນນີ້ ທາງການຂອງຊີເລ ລະບຸວ່າ ເຈົ້າຫນ້າທີ່ມອດໄຟເຮັດວຽກຢ່າງຫນັກຫນ່ວງ ສາມາດຄວບຄຸມໄຟໄຫມ້ປ່າ ທີ່ສວນອຸທິຍານ ແຫ່ງ ຊາດ ໄດ້ແລ້ວ ຫລັງແປວໄຟລຸກ ໄຫມ້ຢ່າງຮຸນແຮງເປັນເວລາ 5 ວັນ. ມີເຈົ້າຫນ້າທີ່ມອດໄຟ 550 ຄົນ ເຂົ້າຮ່ວມການສະກັດກັ້ນ ແລະ ມອດໄຟ. ສວນອຸທິຍານແຫ່ງນີ້ ມີພື້ນທີ່ທັງຫມົດ 2.400 ກິໂລຕາແມັດ (ກມ2), ຊຶ່ງເປັນສະຖານທີ່ທ່ອງທ່ຽວທີ່ສວຍງາມ. ນັກທ່ອງທ່ຽວຊາວ ອິສຣາແອນ ຖືກເຈົ້າຫນ້າທີ່ຄວບຄຸມໂຕ ແລະ ສືບ ສວນ ໂດຍເຈົ້າຫນ້າທີ່ກ່າວຫາວ່າ ເຂົາກະທຳໂດຍປະຫມາດຈາກການຈູດເຈ້ຍ ເຮັດໃຫ້ເກີດໄຟໄຫມ້ງາມໄປທົ່ວສ່ວນອຸທິຍານແຫ່ງນີ້./.
ກັບສາລະບານ
