ສະພາບການເຕີບໂຕ ແລະ ຫົດໂຕດ້ານເສດຖະກິດໃນປະເທດຕ່າງໆ
ນາຍົກລັດຖະມົນຕີ ລີ ຊຽນ ຫລົງ ຂອງສິງກະໂປ ໄດ້ສົ່ງສານອວຍພອນປີໃຫມ່ເຖິງຊາວສິງກະໂປທົ່ວປະເທດ ເນື່ອງໃນໂອກາດສົ່ງທ້າຍປີເກົ່າ ຕ້ອນຮັບ ປີໃຫມ ່ໃນວັນທີ 31 ທັນວາຜ່ານມາ ວ່າອັດຕາການເຕີບໂຕທາງເສດຖະກິດຂອງສິງກະໂປ ໃນປີ 2011 ຢູ່ທີ່ 4,8%, ຕົກຕ່ຳກວ່າທີ່ປະເມີນໄວ້ກ່ອນຫນ້ານີ້ທີ່ 5% ແລະ ສິ່ງແວດລ້ອມພາຍນອກບໍ່ມີຄວາມແນ່ນອນ, ບັນຫາຫນີ້ສິນໃນເອີຣົບ ໄປໄກເກີນກວ່າຈະແກ້ໄຂ ແລະຄາດວ່າປີໃຫມ່ນີ້ ຈະເປັນປີທີ່ຫຍຸ້ງ ຍາກລຳບາກ ຫລາຍ ສຳລັບເສດຖະກິດໂລກ, ຊຶ່ງສິງກະໂປ ກໍເປັນປະເທດຫນຶ່ງທີ່ເປີດປະຕູສູ່ພາຍນອກ, ດັ່ງນັ້ນ ຈຶ່ງຫລີກລຽງບໍ່ໄດ້ ທີ່ຈະໄດ້ຮັບຜົນກະທົບ.
ທີ່ແອັສປາຍ: ລັດຖະບານແອັສປາຍ ເປີດເຜີຍມາດຕະການຮັດສາຍແອວ ໃນຈຳນວນເງິນ 89.000 ລ້ານເອີໂຣ ເພື່ອກະຕຸ້ນເສດຖະກິດຂອງປະເທດ ຫວັງ ຫລຸດ ພົ້ນອອກຈາກພາວະເຕີບໂຕຊ້າ ໃນງວດທຳອິດ ຫລັງປີໃຫມ່ດ້ວຍວົງເງິນ 8.900 ລ້ານເອີໂຣ ໂດຍນາຍົກລັດຖະມົນຕີ ມາເຣຍໂນ ຣາຮອຍ ໄດ້ອະນຸມັດ ມາດ ຕະ ການດັ່ງກ່າວ ລະຫວ່າງກອງປະຊຸມຄະນະລັດຖະບານ, ຊຶ່ງມາດຕະການຮັດສາຍແອວ ປະກອບດ້ວຍການຫລຸດລາຍຈ່າຍຂອງພາກລັດ ແລະ ຂຶ້ນພາສີ ກ່ອນ ຈະມີການຫລຸດລາຍຈ່າຍລົງຫລາຍເທື່ອຫລັງຈາກນີ້ ລວມເຖິງການປະຕິຮູບດ້ານຕ່າງໆ ໃນ 2-3 ເດືອນຂ້າງຫນ້ານີ້ ຕາມແຜນການທີ່ ຕ້ອງຫລຸດງົບ ປະ ມານ ລາຍຈ່າຍໃຫ້ໄດ້ 16.500 ລ້ານເອີໂຣ ພາຍໃນປີ 2012. ຂະນະດຽວກັນ, ບັນດາລັດຖະກອນພາກລັດ ແລະ ແຮງງານພາກບໍລິການສາທາລະນະ ຕ່າງກໍສະແດງຄວາມບໍ່ພໍໃຈກັບມາດຕະການຮັດສາຍແອວ ຂອງລັດຖະບານ ເນື່ອງຈາກເຫັນວ່າ ຈະຍິ່ງເຮັດໃຫ້ມີຄົນຕົກງານ ແລະ ສະພາບເສດຖະ ກິດຝືດ ເຄືອງຫລາຍຂຶ້ນ.
ທີ່ ສ.ເກົາຫລີ: ກະຊວງວິທະຍາສາດ-ເສດຖະກິດ ຂອງ ສ.ເກົາຫລີ ລາຍງານໃນທ້າຍເດືອນທັນວາຜ່ານມາ ວ່າຍອດເກີນດຸນການຄ້າຂອງປະເທດນີ້ ໃນປີ 2011 ຢູ່ໃນລະດັບສູງເປັນປະຫວັດການຢູ່ທີ່ 33.300 ລ້ານໂດລາສະຫະລັດ ຈາກຄວາມຕ້ອງການຂອງຍອດການສົ່ງອອກທີ່ເພີ່ມຂຶ້ນປະມານ 20%. ແຕ່ເຖິງແນວໃດ ກໍດີ, ຄາດວ່າການສົ່ງອອກຂອງປະເທດນີ້ ທີ່ມີຂະຫນາດເສດຖະກິດໃຫຍ່ອັນດັບ 4 ຂອງອາຊີ ຄວນຈະປັບຕົວຫລຸດລົງ ເນື່ອງຈາກຄວາມຮຽກ ຮ້ອງຕ້ອງການ ຂອງຕະຫລາດສົ່ງອອກຫລັກ ລ້ວນມີທ່າອ່ຽງຂະຫຍາຍຕົວຊ້າ, ສວນທາງກັບຍອດການນຳເຂົ້າທີ່ຄວນຈະຫຍັບສູງຂຶ້ນຈາກຜົນພວງ ຂອງລາຄານ້ຳມັນແພງຂຶ້ນ./.
ກັບສາລະບານ
