ໄດ້ອີກແລ້ວ ຫລຽນຄຳ ຈາກສາວລາວແມ໊ນປືນ
(14/12/2009) 15:14 ມ
* ຍິງປືນ ເປັນອີກໜຶ່ງປະເພດກິລາໃນມະຫະກຳກິລາ ຊີເກມຄັ້ງທີ 25 ທີ່ສາມາດສ້າງຜົນ ງານໄດ້ຢ່າງເອກອ້າງມາໃຫ້ຊາດລາວເຮົາ ແລະ ເປັນຂ່າວດີທີ່ແສນ ພາກ ພູມ ໃຈຂອງ ປວງຊົນ ລາວ ທັງຊາດເມື່ອມື້ນີ້,ນັກແມ໊ນປືນສາວລາວທັງດ່ຽວ ແລະ ຊຸດ ກວາດມາໄດ້ 1 ຫລຽນ ຄຳ,1 ຫລຽນ ເງິນ ແລະ 1 ຫລຽນທອງ. ນາງ ຄຳຫລ້າ ໄຊຍະວົງ ຍັງສະແດງຄວາມແມ໊ນຢຳໂດຍການເກາະໄກປືນຢ່າງມີສະມາທິ ຍິງໃນປະເພດ ເປົ້າເລື່ອນປະສົມ 10 ແມັດ ຊະນະຄູ່ຕໍ່ສູ້ຢ່າງເໜືອຊັ້ນ ນຳ ເອົາ ອີກ 1 ຫລຽນຄຳ ມາ ໃຫ້ ຊາດລາວ, ຂະນະ ທີ່ ນາງ ຫົງທອງ ກໍບໍ່ນ້ອຍໜ້າ ໃນການເກາະໄກປືນຢ່າງແມ໊ນຢຳ ໃນປະເພດດຽວກັນ ໄດ້ຫລຽນທອງ. ສ່ວນ ອີກ ໜຶ່ງຫລຽນ ທີ່ສາວລາວ ຍາດມາໄດ້ກໍຄືຫລຽນເງິນ ຈາກການ ຍິ ງເປົ້າເລື່ອນ ຊຸດຍິງ 10 ແມັດ./.
ນັກເກາະໄກປືນຍິງ-ຊາຍຂອງລາວ ເອົາຫຼຽນຄຳມາໄດ້ 2 ຫຼຽນ (14/12/2009) 15:14 ມ
ນັກກິລາຍິງປືນເພດຍິງຂອງລາວ ສ້າງປະຫວັດໃໝ່ໃຫ້ແກ່ວົງການກິລາຂອງ ສປປ ລາວ ດ້ວຍການ ຄວ້າໄຊ ໄດ້ຫຼຽນຄຳມາຄອງ 2 ຫຼຽນ ຈາກການແຂ່ງຂັນຍິງປືນລົມຍາວ ໄລຍະ 10 ແມັດ ປະເພດບຸກຄົນ ແລະ ຄະນະ ຫລື ທີມ . ການແຂ່ງຂັນຍິງປືນລົມຍາວເປົ້າເຄື່ອນທີ່ໄລຍະ 10 ແມັດ ທັງປະເພດບຸກຄົນ ແລະທີມໃນວັນທີ 12 ທັນວາ 2009 ທີ່ສະໜາມຍິງປືນ ແຫ່ງຊາດ ຫລັກ 16 ; ນັກກິລາ ຍິງຂອງລາວປະເພດບຸກຄົນ ຍິງເປົ້າ ເຄື່ອນທີ່; ນາງ ຄຳຫລ້າ ໄຊຍະວົງ ຍິງໄດ້ແມັ່ນກວ່າ ຈຶ່ງ ຄວ້າໄດ້ຫຼຽນຄຳມາຄອງເປັນຜົນສຳເລັດ, ສ່ວນ ຫຼຽນ ເງິນເປັນຂອງນັກ ກິລາ ຈາກ ປະ ເທດ ໄທ ນາງ ທິດາຣັດ ອັດທະກິດ ແລະ ຫຼຽນທອງ ເປັນຂອງ ນາງ ຫງວຽນລີກວຽນ , ນັກກິລາຈາກສສ. ຫວຽດ ນາມ . ຫລຽນຄຳຫຼຽນທີ 2 ຈາກກິລາປະເພດດຽວກັນໄດ້ຈາກ ປະເພດທີມ; ສ່ວນຫລຽນເງິນໃນປະເພດນີ້ ເປັນຂອງທີມນັກ ກິລາ ສສ.ຫວຽດນາມ ແລະ ຫຼຽນທອງ ເປັນຂອງທີມ ນັກເກາະໄກຈາກປະເທດໄທ. ການແຂ່ງຂັນຍິງປືນ ໃນວັນທີ 12 ທັນວາ ມີການຊີງໄຊທັງໝົດ 5 ຫຼຽນຄຳ; ໃນນັ້ນມີ ມີຍິງເປົ້າ ເຄື່ອນ ທີ່ປະ ເພດບຸກຄົນ ແລະ ທີມ ທັງເພດຍິງ ແລະ ຊາຍ. ສຳລັບບຸກຄົນ ເພດຊາຍ ຍິງປືນຍາວ 50 ແມັດ, ຫຼຽນຄຳ ແລະ ເງິນ ເປັນຂອງ ນັກກິລາຈາກ ສ. ມຽນມາ, ທ້າວ ລີນອົງ ແລະ ທ້າວ ອົງຢີນນີ, ສ່ວນ ຫຼຽນທອງເປັນຂອງນັກກິລາຈາກສສ. ຫວຽດນາມ, ທ້າວ ແທັງຟານງັອກ. ໃນປະເພດທີມ, ຍິງປືນຍາວ 50 ແມັດ ຫຼຽນຄຳເປັນຂອງນັກກິລາຈາກ ສ. ມຽນມາ, ຫຼຽນເງິນ ສສ. ຫວຽດນາມ ແລະ ຫຼຽນທອງ ເປັນ ຂອງ ສິງກະໂປ. ໃນປະເພດທີມເພດຍິງ, ປືນຍາວ 50 ແມັດ; ຫຼຽນຄຳເປັນຂອງນັກກິລາ ໄທ, ຫຼຽນເງິນ ອິນໂດ ເນເຊຍ ແລະ ຫຼຽນທອງ ມາເລເຊຍ. ໄລ່ມາຮອດມື້ວານນີ້, ກິລາຍິງປືນ ໃນຊີເກມ 25 ມີການຊີງໄຊໄປແລ້ວຈຳນວນ 16 ຫຼຽນ ຄຳ, 16 ຫຼຽນເງິນ ແລະ 16 ຫຼຽນທອງ; ໃນນັ້ນ ນັກກິລາຈາກປະເທດ ໄທ ກວາດ ໄປຫລາຍກວ່າໝູ່ຄື 6 ຫຼຽນຄຳ, 4 ຫຼຽນເງິນ ແລະ 5 ຫຼຽນທອງ. ທີສອງ ສິງກະໂປ 4 ຫຼຽນຄຳ 3ຫຼຽນເງິນ ແລະ 3 ຫຼຽນທອງ; ຂະນະທີ່ ສປປລາວ ເປັນອັນດັບ 4 ຖັດຈາກ ສ. ມຽນມາ ມີ 2 ຫຼຽນຄຳ ./.
ກັບສາລະບານ
