ສະຫະພັນ ເປຕັງແຫ່ງຊາດ ຄົ້ນ ຫາ ນັກກິລາ ເຂົ້າຮ່ວມແຂ່ງຂັນໃນລະດັບສາກົນ
* ສະຫະພັນ ເປຕັງແຫ່ງຊາດ ກຽມຊອກຄົ້ນນັກກິລາທີ່ມີພອນສະຫວັນລຸ້ນໃຫມ່ ມາເປັນນັກກິລາທີມຊາດ ເພື່ອກຽມເຂົ້າຮ່ວມແຂ່ງຂັນໃນລະດັບສາກົນ ເຊິ່ງ ໃນ ຊີເກມ ຄັ້ງທີ 25 ຜ່ານມາ ເຖິງວ່າ ບໍ່ບັນລຸເປົ້າຫມາຍໃນການຍາດແຍ່ງ ຫລຽນຄຳ ມາຄອງກໍຕາມ, ແຕ່ເພື່ອເປັນການສືບຕໍ່ພັດທະນາກິລາປະເພດນີ້ ໃຫ້ ກ້າວ ຫນ້າຂຶ້ນທາງສະຫະພັນ ໄດ້ກຽມຈັດການແຂ່ງຂັນລາຍການສຳຄັນຕ່າງໆ ເພື່ອຊອກຄົ້ນນັກກິລາທີ່ມີພອນສະຫວັນ. ທ່ານ ຄຳຫລ້າ ວິນໄລທອງ ຮອງປະທານສະຫະພັນ ເປຕັງ ອາຊີ-ປາຊີຟິກ ທັງເປັນເລຂາທິການ ສະຫະພັນ ເປຕັງແຫ່ງຊາດລາວ ກ່າວວ່າ: ເພື່ອຄັດເລືອກ ເອົາ ນັກກິລາທີ່ມີພອນສະຫວັນ ແລະ ມີຄວາມສາມາດສູງ ເຂົ້າມາເປັນນັກກິລາທີມຊາດ ເພື່ອເປັນຕົວແທນໃຫ້ແກ່ປະເທດ ໄປແຂ່ງຂັນໃນດັບສາກົນ ໂດຍສະ ເພາະ ກຽມເຂົ້າຮ່ວມແຂ່ງຂັນ ເປຕັງ ຊີງແຊ໋ມ ອາຊີ-ປາຊີຟິກ ຢູ່ປະເທດ ອົດສະຕຣາລີ ໃນທ້າຍເດືອນ ພະຈິກ 2010 ນີ້ ແລະ ຮ່ວມແຂ່ງຂັນ ເປຕັງ ຊີງ ແຊ໋ມ ໂລກຢູ່ ສປ ຈີນ ໃນທ້າຍເດືອນ ຕຸລາ ປີດຽວກັນ, ພວກເຮົາຈະໄດ້ຈັດການແຂ່ງຂັນ ເປຕັງ ທົ່ວປະເທດ ຊີງຂັນທ່ານ ລັດຖະມົນຕີປະຈຳ ສນຍ, ປະທານ ຄະນະ ກຳມະການກິລາກາຍະກຳ ແຫ່ງຊາດ ເທື່ອທີ 2 ຂຶ້ນ ເຊິ່ງຈະແຂ່ງຂັນ ໃນວັນທີ 5-6 ມີນາ ນີ້ ຢູ່ສະຫນາມ ເປຕັງ ເຂື່ອນໄຟຟ້ານ້ຳງື່ມ 1 ເມືອງແກ້ວອຸດົມ ແຂວງ ວຽງຈັນ. ສຳລັບນັກກິລາທີ່ມີຜົນງານ ເມື່ອຈົບການແຂ່ງຂັນ ນອກຈາກຈະໄດ້ຮັບສິດເຂົ້າຮ່ວມທີມຊາດແລ້ວ ຍັງມີລາງວັນເຊັ່ນ: ຊະນະເລີດ ຈະໄດ້ຮັບຂັນກຽດຕິຍົດ 1 ໜ່ວຍ, ເງິນສົດ 3 ລ້ານກີບ ພ້ອມ ຫລຽນຄຳ, ທີ 2 ຈະໄດ້ຮັບເງິນສົດ 2 ລ້ານກີບ ພ້ອມຫລຽນເງິນ ແລະ ທີ 3 ຈະໄດ້ຮັບ ເງິນສົດ 1 ລ້ານກີບ ພ້ອມ ຫລຽນທອງ./.
ກັບສາລະບານ
