ແຂ່ງຂັນກ໊ອຟ ຊິງຂັນນາຍົກລັດຖະມົນຕີ
*(ຂປລ)ເພື່ອເປັນການສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຄັ້ງທີ II ຂອງອົງຄະນະພັກຫ້ອງວ່າການລັດຖະບານ ທີ່ຈະຈັດຂຶ້ນໃນໝໍ່ໆນີ້ ພ້ອມທັງສ້າງບັນຍາກາດສົ່ງທ້າຍປີເກົ່າ-ຕ້ອນຮັບປີໃໝ່ສາກົນ 2012, ຫ້ອງວ່າການລັດຖະບານ ຈຶ່ງໄດ້ຈັດການແຂ່ງຂັນກ໊ອຟ ຊິງຂັນນາຍົກລັດຖະມົນຕີແຫ່ງ ສປປ ລາວ ໃນວັນທີ 24 ທັນວາ 2011 ທີ່ສະໜາມກ໊ອຟ ຊີເກມ ( ບູຢອງ ຫຼັກ 18 ) ໂດຍເປັນກຽດເຂົ້າຮ່ວມ ທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ ພ້ອມນີ້ ກໍມີບັນດາທ່ານຮອງນາຍົກລັດຖະມົນຕີ,ລັດຖະມົນຕີຊ່ວຍ, ກົມກອງອ້ອມຂ້າງ ແລະ ນັກທຸລະກິດເຂົ້າຮ່ວມການແຂ່ງຂັນ.
ການແຂ່ງຂັນແບ່ງອອກເປັນ 5 ປະເພດ ຄື : ສາຍກິຕິມະສັກ, ສາຍ (ກ), ສາຍ (ຂ), ສາຍ (ຄ) ແລະ ສາຍສຸພາບສະຕຣີ, ນອກນີ້ ຍັງມີຂັນຄະແນນລວມ, ລາງວັນຕີໃກ້ທຸງ ແລະ ລາງວັນຕີໄກ ຊຶ່ງຜົນການແຂ່ງຂັນປາກົດວ່າ : ຊະນະເລີດຄະແນນລວມ ທ່ານ ຄຳແພງ ຄຳປະເສີດ ຈາກເຂດເສດຖະກິດພິເສດບໍ່ແຕນແດນຄຳ, ຊະນະເລີດສາຍກິຕິມະສັກ ທ່ານ ພູເພັດ ຄຳພູນວົງ, ຮອງຊະນະເລີດ ທ່ານ ສົມສະຫວາດ ເລັ່ງສະຫວັດ, ແລະ ອັນດັບ 3 ທ່ານ ບຸນປອນ ບຸດຕະນະວົງ; ຊະນະເລີດສາຍ (ກ) ທ່ານ ພູທອນ, ຮອງຊະນະເລີດ ທ່ານ ທວນທາລາ ແລະ ອັນດັບ 3 ທ່ານ ຄຳແພງ ວົງຂັນຕີ; ຊະນະເລີດສາຍ (ຂ) ທ່ານ ເພັດສາຄອນ ຫຼວງອາໄພ, ຮອງຊະນະເລີດ ທ່ານ ຄຳປະເສີດ ຈາກໄຟຟ້າລາວ ແລະ ອັນດັບ 3 ທ່ານ ບຸນສີ ນັນທະວົງ; ຊະນະເລີດສາຍ (ຄ) ທ່ານ ສາຄອນ ພົງທິລາ, ຮອງຊະນະເລີດ ທ່ານ ພົມມະລີ ແລະ ອັນດັບ 3 ທ່ານ ສູນທອນ ພົມມະຈັກ ແລະ ຊະນະເລີດສາຍສຸພາບສະຕຣີ ທ່ານນາງ ໄຊທານີ ຈັນທະວົງສາ, ຮອງຊະນະເລີດ ທ່ານນາງ ສາຍສະຫວັນ ສິນບັນດິດ ແລະ ອັນດັບ 3 ທ່ານນາງ ແສງມະນີ ວິຍາເກດ.
ກັບສາລະບານ
