ເສີມຂະຫຍາຍສາຍພົວພັນອົງການໄອຍະການ ລາວ-ໄທ
*(ຂປລ): ຄະນະນຳຜູ້ແທນ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ຊຶ່ງນຳໂດຍ ທ່ານ ສົມພັນ ແພງຄຳມີ, ໄອຍະການປະຊາຊົນສູງສຸດ ໄດ້ ຕ້ອນ ຮັບຄະນະຜູ້ແທນ ສຳນັກງານໄອຍະການສູງສຸດ ແຫ່ງ ຣາຊະອານາ ຈັກ ໄທ ຊຶ່ງນຳໂດຍທ່ານ ອັດຖະພົນ ໃຫຍ່ສະຫວ່າງ, ຮອງໄອຍະການສູງສຸດ ແຫ່ງ ຣາຊະອາ ນາຈັກໄທ ໃນວັນທີ 5 ມີນາ 2010 ໃນໂອກາດທີ່ຄະນະຜູ້ແທນດັ່ງກ່າວ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ແຕ່ວັນທີ 5-7 ມີນາ 2010. ທ່ານ ສົມພັນ ແພງຄຳມີ ໄດ້ສະແດງຄວາມຍິນດີຕ້ອນຮັບ ຕໍ່ການມາຢ້ຽມຢາມ ຂອງຄະນະຜູ້ແທນດັ່ງກ່າວ ຊຶ່ງເປັນການເສີມຂະຫຍາຍສາຍພົວພັນ ມິດຕະ ພາບຖານບ້ານໃກ້ເຮືອນຄຽງ ຂອງປະຊາຊົນສອງຊາດ ລາວ-ໄທ ໂດຍສະເພາະແມ່ນຄວາມມັກຄີຂອງສອງອົງການໄອຍະການ ແລະ ເປັນໂອກາດອັນດີ ໃຫ້ທັງ ສອງພາກ ສ່ວນໄດ້ມີການແລກ ປ່ຽນບົດຮຽນໃນການເຄື່ອນໄຫວວຽກງານໃຫ້ມີປະສິດທິຜົນສູງສຸດ. ໃນຕອນບ່າຍຂອງວັນດຽວກັນ ຄະນະຜູ້ແທນທັງສອງຝ່າຍ ໄດ້ຈັດກິດຈະກຳເຕະບານມິດຕະພາບຮ່ວມກັນ ຢູ່ທີ່ສະໜາມກິລາແຫ່ງຊາດເຈົ້າອານຸວົງ ຊຶ່ງກິດຈະ ກຳ ດັ່ງກ່າວ ທັງສອງຝ່າຍຈະໄດ້ຜັດປ່ຽນກັນເປັນເຈົ້າພາບ ຈັດຂຶ້ນໃນທຸກໆຄັ້ງ ແລະ ໃນຕອນຄ່ຳ ທາງອົງການໄອຍະການປະຊາຊົນສູງສຸດ ແຫ່ງ ສປປ ລາວ ໄດ້ ຈັດ ງານລ້ຽງຕ້ອນຮັບ ຄະ ນະຜູ້ແທນ ພ້ອມນັກກິລາ ຂອງສອງປະເທດ ຢູ່ທີ່ໂຮງແຮມລ້ານຊ້າງ ນະຄອນຫລວງວຽງຈັນ./.
ກັບສາລະບານ
