ສຳຫລວດສະໝາມບິນ 3 ແຫ່ງຢູ່ພາກເໜືອ ເພື່ອປັບປຸງຄືນໃໝ່
*(ຂປລ): ລັດຖະບານ ກຳລັງດຳເນີນການສຳຫລວດ ຄວາມເປັນໄປໄດ້ໃນການເລີ່ມຕົ້ນກໍ່ສ້າງ ແລະ ປັບປຸງສະໜາມບິນແຫ່ງໃໝ່ ໃນ 3 ແຂວງພາກເໜືອຂອງ ສປປ ລາວ ຄື: ແຂວງຫົວພັນ, ແຂວງຊຽງຂວາງ ແລະ ແຂວງບໍ່ແກ້ວ ເພື່ອຍົກລະດັບຂີດຄວາມສາມາດ ແລະ ການຕອບສະໜອງການບໍລິການໃຫ້ດີຂຶ້ນກວ່າເກົ່າ ເນື່ອງຈາກວ່າສະໜາມບິນໃນ 3 ແຂວງດັ່ງກ່າວ ມີຂະໜາດຈຳກັດ ໃນການຮອງຮັບການຂຶ້ນລົງຂອງເຮືອບິນ ແລະ ຍັງເຫັນວ່າເປັນສະໜາມບິນເກົ່າ ທີ່ມີການກໍ່ສ້າງມາໄດ້ຫລາຍປີແລ້ວ.
ທ່ານ ຢາກົວ ລໍປາງກາວ, ຫົວໜ້າກົມການບິນພົນລະເຮືອ ແຫ່ງ ສປປ ລາວໄດ້ໃຫ້ ສຳພາດ ຕໍ່ນັກຂ່າວ ຈາກສຳນັກຂ່າວສານປະເທດລາວ ໃນຕົ້ນເດືອນມີນາ 2010 ນີ້ວ່າ: ປະຈຸບັນນີ້ ກົມການບິນພົນລະເຮືອ ໄດ້ຮ່ວມມືກັບຫລາຍອົງການຈັດ ຕັ້ງທີ່ກ່ຽວຂ້ອງ ຂອງລັດ ລົງດຳເນີນການສຳຫລວດຄວາມເປັນໄປໄດ້ໃນການກໍ່ສ້າງ ແລະ ປັບປຸງສະ ໜາມບິນຄືນໃໝ່ ໃນຫລາຍແຂວງຂອງ ສປປ ລາວ ໂດຍສະເພາະໃນ 3 ແຂວງດັ່ງກ່າວ ຊຶ່ງແຜນການດັ່ງກ່າວນີ້ ແມ່ນຄວາມພະຍາຍາມຂອງລັດຖະບານລາວ ເພື່ອຍົກລະດັບ ແລະ ມາດຕະຖານຂອງສະໜາມບິນໃຫ້ດີຂຶ້ນກວ່າເກົ່າ ໃນການຮອງສິ່ງທ້າຍຫລາຍ ຢ່າງໃນອະນາຄົດ ແລະ ມີພຽງແຂວງຊຽງຂວາງເທົ່ານັ້ນ ຫາກໍ່ໄດ້ສຳເລັດວຽກງານການສຳຫລວດ ຂະນະນີ້ ທາງກົມການບິນພົນລະເຮືອ ກຳລັງຈະ ສະເໜີລາຍລະອຽດໃຫ້ແກ່ລັດຖະບານ ພິຈາລະນາຄວາມເປັນໄປໄດ້ໃນການອະນຸມັດງົບປະມານ ໃນການຈັດຕັ້ງປະຕິບັດສຳລັບວຽກງານການກໍ່ສ້າງ ແລະ ປັບປຸງຄືນໃໝ່.
ທ່ານ ຢາກົວ ໄດ້ອະທິບາຍຕື່ມວ່າ: ໂຄງການກໍ່ສ້າງ ແລະ ປັບປຸງສະໜາມບິນໃໝ່ນັ້ນ ແມ່ນຈະໄດ້ຂະຫຍາຍສະໜາມບິນທົ່ງໄຫຫີນເກົ່າ ໃຫ້ມີຄວາມສາມາດ ຮອງຮັບເຮືອບິນຂະໜາດນ້ອຍ ແລະ ໃຫຍ່ໄດ້ຕາມຄວາມເໝາະສົມ ໂດຍຄາດການວ່າ ໂຄງການປັບປຸງສະໜາມບິນດັ່ງກ່າວນີ້ ຈະມີຄວາມຍາວ 3 ກິໂລແມັດ ແລະ ກວ້າງປະມານ 35 ແມັດ ຂະນະທີ່ສະໜາມບິນເກົ່ານັ້ນມີຄວາມຍາວພຽງ 2 ກິໂລແມັດກວ່າ ແລະ ຄວາມກວ້າງ 35 ແມັດ./.
ກັບສາລະບານ
