ຜູ້ນຳຂັ້ນສູງລາວຕ້ອນຮັບຄະນະຜູ້ແທນຫວຽດນາມ
*(ຂປລ): ສະຫາຍ ບຸນຍັງ ວໍລະຈິດ, ກຳມະການກົມການເມືອງສູນກາງພັກ, ຜູ້ປະຈຳການຄະນະ ເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ຕ້ອນຮັບ ສະຫາຍ ຫງວຽນ ຊວນ ຝຸກ, ກຳມະການສູນກາງພັກກອມມູນິດຫວຽດນາມ, ລັດຖະມົນຕີ, ຫົວໜ້າຫ້ອງວ່າການລັດຖະບານ ແຫ່ງ ສສ ຫວຽດນາມ ພ້ອມດ້ວຍຄະນະ ໃນວັນທີ 4 ມີນາ 2010 ທີ່ສຳນັກງານປະທານປະເທດ (ຫໍຄຳ) ໃນໂອ ກາດທີ່ຄະນະດັ່ງກ່າວ ໄດ້ເດີນມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 3-6 ມີນາ 2010 ຢ່າງເປັນທາງການ.
ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຄະນະຜູ້ແທນຫວຽດ ນາມ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນສຳຄັນ ເຂົ້າໃນການເພີ່ມພູນຄູນສ້າງ ສາຍພົວພັນ ມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບ ດ້ານ ລະຫວ່າງ ລາວ-ຫວຽດນາມ ໂດຍສະເພາະ ແມ່ນການສືບຕໍ່ຮັດແໜ້ນສາຍພົວພັນ ຮ່ວມມືທີ່ດີງາມ ລະຫວ່າງ ຫ້ອງວ່າການສຳນັກງານຍາຍົກລັດຖະມົນຕີ ແລະ ຄະນະເລຂາທິການລັດ ຖະບານ ແຫ່ງ ສປປ ລາວ ກັບຫ້ອງວ່າການລັດຖະບານແຫ່ງ ສສ ຫວຽດນາມ ໃຫ້ນັບມື້ຂະຫຍາຍຕົວຢ່າງບໍ່ຢຸດຢັ້ງ.
ສະຫາຍ ຫງວຽນ ຊວນ ຝຸກ ໄດ້ລາຍງານໃຫ້ສະຫາຍຮອງປະເທດ ແຫ່ງ ສປປ ລາວ ໄດ້ຮັບຊາບ ເຖິງຈຸດປະສົງການເດີນທາງມີຄັ້ງນີ້ ແລະ ແຈ້ງຜົນຂອງ ການພົບປະຄະນະວິຊາການ ທີ່ກ່ຽວຂ້ອງຂອງ ທັງສອງຝ່າຍ ລາວ-ຫວຽດນາມ ຊຶ່ງຈັດຂຶ້ນໃນຕອນເຊົ້າຂອງວັນດຽວກັນ ທີ່ສຳນັກງານນາຍົກລັດຖະມົນ ຕີ. ທັງສອງຝ່າຍໄດ້ມີການພົບປະ ແລກປ່ຽນບົດຮຽນ ການຄຸ້ມຄອງວຽກງານຂອງລັດຖະບານ, ການແລກປ່ຽນຂໍ້ມູນຂ່າວສານຕ່າງໆ, ວຽກງານພົວພັນຕ່າງ ປະເທດກັບບັນດາປະເທດຕ່າງໆ, ອົງການຈັດຕັ້ງ ສາກົນ ແລະ ການພົວພັນ ລະຫວ່າງ ສອງຫ້ອງວ່າການ, ພ້ອມນີ້ ຍັງໄດ້ຫາລືການປັບປຸງ ແລະ ບູລະນະການປົກຄອງ ຂອງລັດຖະບານ, ໂຄງຮ່າງການຈັດຕັ້ງ, ສິດ-ໜ້າທີ່, ພາລະບົດບາດຂອງຫ້ອງວ່າການ, ວຽກງານການຈໍລະຈອນເອກະສານ, ການສຳເນົາເອກະສານ, ການບໍລິຫານທົ່ວໄປ ແລະ ວຽກງານອື່ນໆອີກ.
ໃນການພົບປະກັນຄັ້ງນີ້ ທັງສອງຝ່າຍໄດ້ຮ່ວມກັນລົງນາມ ໃນບົດບັນທຶກການຮ່ວມມື ລະຫວ່າງຫ້ອງວ່າການ ສຳນັກງານນາຍົກລັດຖະມົນຕີ ແຫ່ງ ສປປ ລາວ ແລະ ຫ້ອງວ່າການລັດຖະບານ ສສ ຫວຽດນາມ ທີ່ໄດ້ລະບຸກເຖິງແຜນການຮ່ວມມື ຂອງທັງສອງຝ່າຍໃນແຕ່ລະປີ ເພື່ອແລກປ່ຽນຄະນະ ຜູ້ແທນຂອງຕົນໄປຢ້ຽມຢາມ ແລະ ແລກປ່ຽນບົດຮຽນຮ່ວມກັນ, ການຍົກລະດັບພະນັກງານ ໃນຮູບແບບການຝຶກອົບຮົມໄລຍະເສັ້ນ ແລະ ການສືບຕໍ່ສ້າງລະ ບົບສູນຂ່າວສານ ແລະ ເວັບໄຊ ຮ່ວມກັນ ແລະ ວຽກງານອື່ນອີກ ຊຶ່ງເປັນກຽດລົງນາມໃນສັນຍາດັ່ງກ່າວ ລະຫວ່າງ ສະຫາຍ ເຈືອງ ສົມບູນຂັນ, ກຳມະການສູນກາງພັກ, ເລຂາອົງຄະນະພັກຫ້ອງວ່າການສຳນັກງານນາຍົກລັດຖະມົນຕີ, ລັດຖະມົນຕີປະຈຳສຳນັກ ງານ ນາຍົກລັດຖະມົນຕີ, ຫົວໜ້າຄະນະເລຂາທິການລັດຖະບານ ແຫ່ງ ສປປ ລາວ ແລະ ສະຫາຍ ຫງວຽນ ຊວນ ຝຸກ, ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າ ການລັດຖະບານ ແຫ່ງ ສສ ຫວຽດນາມ ໂດຍມີພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ. ໃນໂອກາດດຽວກັນນີ້ ຄະນະຜູ້ແທນຫວຽດນາມ ກໍໄດ້ມອບເຄື່ອງ ຄອມພີວເຕີຈຳນວນ 54 ຊຸດ ເພື່ອນຳໃຊ້ເຂົ້າໃນວຽກງານສຳນັກງານ ນາຍົກ ລັດຖະມົນຕີແຫ່ງ ສປປ ລາວ ຢ່າງມີປະສິດທິຜົນຍິ່ງຂຶ້ນ.
ໃນວັນດຽວກັນນີ້ ຄະນະຜູ້ແທນຫ້ອງວ່າການລັດຖະບານແຫ່ງ ສສ ຫວຽດນາມ ນຳໂດຍສະ ຫາຍ ຫງວຽນ ຊວນ ຝຸກ, ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການລັດຖະບານ ແຫ່ງ ສສ ຫວຽດນາມ ພ້ອມດ້ວຍຄະນະ ກໍໄດ້ເຂົ້າຢ້ຽມຂ່ຳນັບ ສະຫາຍ ບົວສອນ ບຸບຜາວັນ, ກຳມະການກົມການ ເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ ຢູ່ທີ່ສຳນັກງານນາຍົດລັດຖະມົນຕີ, ນະຄອນຫລວງວຽງຈັນ ເຊັ່ນດຽວກັນ./.
ກັບສາລະບານ
