ລາວແລະເອດີບີ ປຶກສາຫາລືທິດທາງໃຫມ່ສຳລັບແຜນຍຸດທະສາດການຮ່ວມມື
*(ຂປລ): ລັດຖະບານ ສປປ ລາວ ແລະ ທະນາຄານພັດທະນາອາຊີ (ADB)ໄດ້ຮ່ວມປຶກສາຫາລື ເພື່ອລິເລີ່ມການກະກຽມແຜນຍຸດທະສາດ ການຮ່ວມມືໄລ ຍະໃໝ່ໃນລະຫວ່າງປີ 2012-2016, ແຜນຍຸດທະສາດການຮ່ວມມືໄລຍະໃໝ່ຈະໄດ້ວາງແຜນໃຫ້ຖືກຕ້ອງຕາມເປົ້າໝາຍການພັດທະນາອັນເປັນບູລິມະສິດ ຂອງ ລັດຖະບານ ແລະ ຍັງໃຫ້ການສະໜັບໜູນໂດຍກົງ ສຳລັບລັບການຈັດຕັ້ງປະຕິບັດແຜນຍຸດທະສາດ ການພັດທະນາເສດຖະກິດ-ສັງຄົມແຫ່ງຊາດຄັ້ງທີ 7 ຂອງລັດຖະບານ. ກອງປະຊຸມປຶກສາຫາລື ໄດ້ຈັດຂຶ້ນ ໃນວັນທີ 22 ກຸມພາ 2010, ທີ່ນະຄອນຫລວງວຽງຈັນໂດຍການເປັນປະທານຂອງ ທ່ານ ບຸນທະວີ ສີສຸພັນທອງ, ລັດຖະ ມົນຕີຊ່ວຍວ່າການ ກະຊວງແຜນການ ແລະ ການລົງທຶນ, ມີທ່ານ ກຽວຮົງ ກີມ, ຜູ້ຕາງໜ້າ ADB ປະຈຳ ລາວ ແລະ ກະຊວງທີ່ກ່ຽວຂ້ອງເຂົ້າຮ່ວມ. ກອງປະຊຸມ ໄດ້ປຶກສາຫາລືກ່ຽວກັບບັນດາສິ່ງທ້າທາຍຕ່າງໆໃນການພັດທະນາຢູ່ ສປປລາວ ພວມປະເຊີນຢູ່. ເພື່ອຮັບປະກັນເຮັດໃຫ້ແຜນ ຍຸດທະສາດການ ຮ່ວມມືດັ່ງກ່າວຖືກຕ້ອງກັບອັນທີ່ເປັນບູລິມະສິດ ທີ່ນອນຢູ່ໃນແຜນຍຸດທະສາດ ການພັດທະນາເສດຖະກິດ-ສັງຄົມແຫ່ງຊາດຄັ້ງທີ 7ຂອງລັດຖະບານ ແລະ ວາງ ທິດທາງການສະໜັບສະໜູນຂອງ ADB ໃນໄລຍະ 5 ປີຕໍ່ໜ້າ. ຜູ້ເຂົ້າຮ່ວມໄດ້ຮ່ວມກັນວາງທິດທາງ ແລະ ປຶກສາຫາລືກ່ຽວກັບບັນດາຂໍ້ຜູກມັດ ແລະ ຂໍ້ຫຍຸ້ງຍາກຕ່າງໆ ຂອງການພັດທະນາ ໃນລະດັບມະຫາພາກ, ລະດັບຂັ້ນ ຂະແໜງການຕ່າງໆ ເພື່ອເຮັດແນວໃດ ແຜນຍຸດທະສາດການພັດທະນາເສດຖະກິດ-ສັງຄົມແຫ່ງຊາດຄັ້ງທີ 7 ຂອງລັດຖະບານ ແລະ ແຜນຍຸດທະສາດການ ຮ່ວມມືສຳລັບປະເທດ ລະຫວ່າງລັດຖະບານ ກັບ ເອດີບີ ຈະໄປໃນທິດທາງອັນດຽວກັນ ໃນການແກ້ໄຂບັນດາຂໍ້ຜູກມັດ ແລະ ຫຍຸ້ງຍາກດັ່ງກ່າວ. ກອງປະຊຸມໄດ້ຍົກໃຫ້ເຫັນທິດທາງຍຸດທະສາດການພັດທະນາເສດຖະກິດ-ສັງຄົມ ແຫ່ງຊາດຄັ້ງທີ 7 ເພື່ອຫາລືກ່ຽວກັບຂໍ້ຫຍຸ້ງຍາກ ອັນສຳຄັນ ທີ່ ສປປ ລາວ ກຳ ລັງປະເຊີນຢູ່, ຜົນຂອງການປະຕິບັດງານຂອງແຜນຍຸດທະສາດ ການຮ່ວມມືສຳລັບປະເທດ ທີ່ພວມດຳເນີນຢູ່ໃນໄລຍະປະຈຸບັນ, ຜົນທີ່ໄດ້ຮັບໃນຂະແໜງ ການ ແລະ ວຽກງານທີ່ຫລາກຫລາຍ ຂອງຂະແໜງການຕ່າງໆ, ການປະເມີນຜົນຂະແໜງການ, ບັນດາຍຸດທະສາດ ແລະ ແຜນທິດທາງ ລວມທັງວຽກ ງານໃນຂະ ແໜງ ການ ກະສິກຳ ແລະ ຊັບພະຍາກອນທຳມະຊາດ, ພື້ນຖານໂຄງລ່າງ, ການເງິນ ແລະ ການພັດທະນາເອກະຊົນ, ການຄຸ້ມຄອງບໍລິຫານການເງິນພາກລັດ ບັນ ດາຂະແໜງການສັງຄົມມີ ສາທາ, ສຶກສາ,ສິ່ງແວດລ້ອມ ແລະ ການປ່ຽນແປງດິນ ຟ້າອາກາດ ແລະອື່ນໆ. ຜົນຂອງການຫາລື ຈະໄດ້້ກຳນົດທິດທາງຍຸດທະສາດທີ່ຊັດເຈນສຳລັບການຮ່ວມມືລະຫວ່າງລັດ ຖະບານກັບ ເອດີບີ ເພື່ອຈະດຳເນີນຕາມແຜນຍຸດທະສາດ ການ ຮ່ວມມືໃນໄລຍະ 5 ປີຂ້າງໜ້າ. ກອງປະຊຸມຄັ້ງນີ້ ເປັນການເລີ່ມຕົ້ນເພື່ອກະກຽມແຜນຍຸດທະສາດ 5 ປີ ຂອງການຮ່ວມມື ສຳລັບປະເທດຂອງ ADB ແລະ ແຜນ ຍຸດທະສາດດັ່ງກ່າວ ຄາດວ່າຈະໄດ້ຮັບການຮັບຮອງຈາກສະພາບໍລິຫານ ADB ໃນທ້າຍປີ 2011, ຫລັງຈາກທີ່ແຜນຍຸດທະສາດ ການພັດທະນາເສດຖະກິດ-ສັງຄົມແຫ່ງຊາດຄັ້ງທີ 7 ຂອງລັດຖະບານ ໄດ້ຮັບອະນຸມັດຈາກສະພາແຫ່ງຊາດ./.
ກັບສາລະບານ
