ປັບປຸງ-ຍົກສູງຄຸນນະພາບວຽກງານໂຄສະນາອົບຮົມ ໄລຍະໃໝ່
*(ຂປລ): ກອງປະຊຸມ ປັບປຸງ ແລະ ຍົກສູງຄຸນນະພາບວຽກງານໂຄສະນາອົບຮົມ ໄດ້ຈັດຂຶ້ນແຕ່ວັນທີ 2-3 ກຸມພາ 2012 ນີ້ ທີ່ຄະນະໂຄສະນາອົບຮົມ ສູນກາງພັກ ໂດຍພາຍໃຕ້ການເປັນປະທານຂອງ ທ່ານ ເຈືອງ ສົມບູນຂັນ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ມີພາກ ສ່ວນກ່ຽວຂ້ອງຈາກ ກະຊວງ, ອົງການອ້ອມຂ້າງສູນກາງ, ບັນດາຄະນະປະຈຳພັກແຂວງ, ຜູ້ຊີ້ນຳວຽກງານໂຄສະນາອົບຮົມ, ຫົວ ໜ້າໂຄສະນະອົບຮົມນະ ຄອນຫລວງ ແລະ ບັນດາແຂວງໃນທົ່ວປະເທດເຂົ້າຮ່ວມ ເພື່ອຄົ້ນຄວ້າສົນທະນາ, ແລກປ່ຽນຄຳຄິດຄຳເຫັນກ່ຽວກັບວິທີການ ແລະ ມາດຕະການ ເພື່ອ ແກ້ໄຂບັນຫາ ຄົງຄ້າງໃນການດຳເນີນ ວຽກງານໂຄສະນາອົບຮົມ ແນໃສ່ປັບປຸງ ແລະ ຍົກສູງຄຸນນະພາບຂອງວຽກງານໂຄສະນາອົບຮົມໃຫ້ດີຂຶ້ນ.
ໃນວາລະການດຳເນີນກອງປະຊຸມ, ທ່ານ ສີສຸກ ພິລາວົງ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຖະແຫລ່ງຂ່າວຕໍ່ສື່ມວນຊົນ ໂດຍທ່ານໄດ້ຍົກ ໃຫ້ເຫັນເຖິງ ຈຸດປະສົງຂອງກອງປະຊຸມ ແມ່ນເພື່ອ ເຮັດໃຫ້ບັນດາຜູ້ເຂົ້າຮ່ວມ ກຳແໜ້ນທິດທາງແຜນງານ ແລະ ໂຄງການຈຸດສຸມຂອງວຽກໂຄສະນາອົບຮົມ ແຕ່ນີ້ຮອດປີ 2015 ພ້ອມທັງແນະນຳທິດທາງ ແລະ ວິທີການໃນການຈັດຕັ້ງປະຕິບັດຕົວຈິງ; ຄົ້ນຄວ້າເຊື່ອມຊຶມ ກຳແໜ້ນເນື້ອໃນສຳຄັນ ຂອງບົດປາໄສ ຂອງທ່ານເລຂາທິການໃຫຍ່ ຈູມມາລີ ໄຊຍະສອນ ກ່ຽວກັບວຽກ ງານກໍ່ສ້າງຮາກຖານການເມືອງ-ພັດທະນາຊົນນະບົດຮອບດ້ານ ໂດຍຖືເອົາເນື້ອໃນ ດັ່ງກ່າວ ເປັນເນື້ອໃນສຳຄັນສຳລັບການໂຄສະນາສຶກສາ-ອົບຮົມ ເພື່ອເຮັດໃຫ້ພະນັກງານສະມາຊິກພັກ ແລະ ປະຊາຊົນບັນດາຊັ້ນຄົນຢູ່ທ້ອງຖິ່ນຮາກ ຖານໄດ້ຮັບຮູ້ຢ່າງເລິກເຊິ່ງ ກວ້າງຂວາງ ເພື່ອຈັດຕັ້ງປະຕິບັດໃຫ້ປະກົດຜົນເປັນຈິງ. ພ້ອມກັນນີ້, ກອງປະຊຸມຍັງໄດ້ຮັບຟັງການຊີ້ນຳ ຂອງທ່ານຫົວໜ້າຄະນະ ໂຄສະນາອົບຮົມສູນກາງພັກ ກ່ຽວກັບການໂຄສະນາປາຖະກະຖາ ແລະ ຈັດຕັ້ງກິດຈະກຳຕ່າງໆ ເພື່ອສະເຫລີມສະຫລອງປີສາມັກຄີ ມິດຕະພາບ ລາວ- ຫວຽດນາມ ປີ 2012.
ສຳລັບວຽກງານຈຸດສຸມ ແລະ ວິທີການຕົ້ນຕໍ ເພື່ອປັບປຸງຄຸນນະພາບ ຂອງວຽກງານໂຄສະນາອົບຮົມ ແມ່ນສືບຕໍ່ຈັດຕັ້ງເຜີຍແຜ່-ຄົ້ນຄວ້າເຊື່ອມຊຶມມະຕິ ກອງປະຊຸມໃຫຍ່ຄັ້ງທີ IX ຂອງພັກຕິດພັນກັບການສຳຫລວດກວດກາ ການຜັນຂະຫຍາຍເຂົ້າສູ່ຕົວຈິງ; ວຽກງານໂຄສະນາປາຖະກະຖາເນື່ອງໃນໂອກາດ ວັນສຳຄັນຕ່າງໆ, ສ້າງຕັ້ງຍູ້ແຮງການເຄື່ອນໄຫວຂອງກອງໂຄສະນາເຄື່ອນທີ່; ອົບຮົມທິດສະດີແນວທາງ ແລະ ການເມືອງ-ແນວຄິດ; ການຮ່ວມມື ແລະ ການນຳໃຊ້ສື່ເຂົ້າໃນວຽກງານໂຄສະນາອົບຮົມ ຊຶ່ງຄະນະໂຄສະນາອົບຮົມ ແຕ່ລະຂັ້ນຕ້ອງຮູ້ນຳໃຊ້ສື່ຕ່າງໆທີ່ມີຢູ່ຂັ້ນສູນກາງ ແລະ ທ້ອງຖິ່ນຂອງຕົນເຂົ້າໃນ ວຽກງານໂຄສະນາສຶກ ສາອົບຮົມຢ່າງຕັ້ງໜ້າ; ປັບປຸງ ແລະ ຍົກຄຸນະພາບຂອງວາລະສານ “ໂຄສະນາ“ ແລະ ວາລະສານ “ອາລຸນໃໝ່“; ເພີ່ມທະວີຄວາມ ສາມາດ ໃນການກຳແໜ້ນສະພາບແນວຄິດ ແລະ ຫາງສຽງສັງຄົມ; ເປັນເຈົ້າການລາຍງານ, ຄົ້ນຄວ້າ ນຳສະເໜີວິທີການນຳພາ ແລະ ແກ້ໄຂ; ປັບປຸງ ການຈັດຕັ້ງ ແລະ ແບບແຜນວິທີເຮັດວຽກຂອງ ຄະນະໂຄສະນາອົບຮົມແຕ່ລະຂັ້ນ, ປະຕິບັດລະບອບການຝຶກອົບຮົມ ຍົກລະດັບໃຫ້ແກ່ບຸກຄະລາກອນ ທັງຢູ່ຂັ້ນ ສູນກາງ ແລະ ທ້ອງຖິ່ນ ໂດຍສຸມໃສ່ຂັ້ນເມືອງ ແລະ ອື່ນໆ./.
ກັບສາລະບານ
