ຜູ້ແທນກະຊວງການຕ່າງປະເທດອາເມລິກາຢ້ຽມຢາມລາວ
*(ຂປລ) : ຄະນະຜູ້ແທນກະຊວງການຕ່າງປະເທດສະຫະລັດອາເມລິກາ ນຳໂດຍ ທ່ານ Kurt Campbell, ຜູ້ຊ່ວຍລັດຖະມົນຕີກະຊວງການຕ່າງ ປະເທດອາເມ ລິກາ, ຮັບຜິດຊອບວຽກງານອາຊີຕາເວັນອອກ ແລະ ປາຊີຟິກ ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງ ວັນທີ 10-11 ມີນາ 2010 ເພື່ອເຂົ້າ ຮ່ວມ ກອງປະຊຸມປຶກສາຫາລືຮອບດ້ານກ່ຽວກັບການພົວພັນ ແລະ ການຮ່ວມມື ລະຫວ່າງ ສປປ ລາວ-ສະຫະລັດ ອາເມລິກາ. ການມາຢ້ຽມຢາມຄັ້ງນີ້ເປັນການປະກອບສ່ວນສຳຄັນໃນການຮັດແໜ້ນສາຍພົວພັນການຮ່ວມມື ແລະ ເປັນຂີດໝາຍໃນສາຍພົວພັນອັນຍາວນານ ຂອງສອງ ປະ ເທດ ແລະ ປະຊາຊົນສອງຊາດ ລາວ-ອາເມລິກາ, ຊຶ່ງພວມຢູ່ໃນໄລຍະການສະເຫລີມສະຫລອງ ວັນສ້າງຕັ້ງສາຍພົວພັນການ ທູດ ລະ ຫວ່າງສອງປະເທດຄົບ ຮອບ 55 ປີ. ໃນວັນທີ 11 ມີນານີ້ ທ່ານ Kurt Campbell ພ້ອມຄະນະ ໄດ້ເຂົາຢ້ຽມຂ່ຳນັບ ທ່ານ ດຣ ທອງ ລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າ ການກະ ຊວງການຕ່າງປະເທດ ແລະ ພົບປະສອງຝ່າຍ ກັບ ທ່ານ ພົງສະຫວັດ ບຸບຜາ, ລັດຖະມົນຕີຊ່ວຍວ່າການກະຊວງການ ຕ່າງປະ ເທດ. ໃນໂອກາດພົບປະທັງສອງ ຝ່າຍ ໄດ້ແລກປ່ຽນບົດຮຽນ, ຂໍ້ມູນຂ່າວສານນຳກັນຢ່າງ ກວ້າງ ຂວາງ ກ່ຽວກັບບັນຫາຕ່າງໆ ເຊັ່ນ : ການຮ່ວມມືສອງຝ່າຍ, ບັນຫາພາກພື້ນ ແລະ ຂົງເຂດ, ແລະ ບັນຫາອື່ນໆທີ່ສອງຝ່າຍມີຄວາມສົນໃຈນຳກັນ./.
ກັບສາລະບານ
