ປະເທດພາກພື້ນ ຮ່ວມກັນພັດທະນາ ປັບປຸງຊີວິດການເປັນຢູ່ຂອງຊຸມຊົນ
*(ຂປລ): ລັດຖະບານ ສປປ ລາວ ຮ່ວມກັບທະນາຄານໂລກ ໄດ້ຈັດການສຳມະນາພາກພື້ນ ກ່ຽວກັບການພັດທະນາ ແລະ ປັບປຸງຊີວິດການເປັນຢູ່ຂອງ ຊຸມຊົນ ໃນ ສປປ ລາວ ໂດຍມີຕົວແທນຈາກ 11 ປະເທດຄື: ບັງກະລາເດັສ, ອິນເດຍ, ສີລັງກາ, ກຳປູເຈຍ, ຫວຽດນາມ, ອິນໂດເນເຊຍ, ຟີລິບປິນ, ຕີມໍເລັສ ເຕ, ຈີນ, ມົງໂກລີ ແລະ ລາວ ເຂົ້າຮ່ວມ.
ທ່ານ ເມກ ພັນລັກ, ລັດຖະມົນຕີຊ່ວຍວ່າການ ປະຈຳຫ້ອງວ່າການລັດຖະບານ, ຮອງປະທານຄະນະ ຊີ້ນຳພັດທະນາຊົນນະບົດ ແລະ ແກ້ໄຂຄວາມທຸກ ຍາກແຫ່ງຊາດ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບບັນດາຜູ້ແທນທຸກປະເທດ ເຂົ້າສູ່ປີທ່ອງທ່ຽວລາວ 2012, ພ້ອມທັງ ຊີ້ໃຫ້ເຫັນວ່າ: ການ ສຳມານາຄັ້ງນີ້ ມີຄວາມສຳຄັນຍິ່ງ ສຳລັບ ສປປ ລາວ ທີ່ຈະໄດ້ຮຽນຮູ້ ແລະ ແລກປ່ຽນບົດຮຽນນຳກັນ ໂດຍສະເພາະ ຮູບ ແບບວິທີການພັດທະນາ ແລະ ປັບປຸງຊີວິດການເປັນຢູ່ຂອງຊຸມຊົນ ຊຶ່ງສອດຄ່ອງກັບນະໂຍບາຍ ແລະ ແຜນ ງານຂອງລັດຖະບານ ກໍຄື ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 7 ແລະ ມະຕິກອງປະຊຸມ ໃຫຍ່ ຄັ້ງທີ IX ຂອງພັກ ທີ່ໄດ້ກຳນົດການບຸກທະລຸທັງ 4 ດ້ານຄື: ດ້ານຈິນຕະນາການ, ການພັດທະນາຊັບພະຍາກອນມະ ນຸດ, ດ້ານລະບຽບການບໍລິຫານລັດ ແລະ ການແກ້ໄຂຄວາມທຸກຍາກ. ພ້ອມດຽວກັນນັ້ນ ປະທານປະເທດ ແຫ່ງ ສປປ ລາວ ຍັງໄດ້ເນັ້ນກ່ຽວກັບການ ພັດທະນາຊົນນະບົດ ແລະ ແກ້ໄຂຄວາມທຸກຍາກ ໂດຍໃຫ້ເອົາໃຈໃສ່ສ້າງສະຕິຄວາມເປັນເຈົ້າ ໃຫ້ແກ່ຊາວກະສິກອນ ໄປຄຽງຄູ່ກັບການສ້າງຂີດຄວາມ ສາມາດ ແນໃສ່ ຊຸກຍູ້ການພັດທະນາຊຸມຊົນດ້ວຍເຂົ້າເອງ. ການພັດທະນາໂດຍຊຸມຊົນ ແມ່ນວິທີການສຳຄັນ ທີ່ຈະຊ່ວຍໃຫ້ ສປປ ລາວ ສາມາດ ບັນລຸໄດ້ເປົ້າໝາຍການພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 7 ແລະ ເປົ້າໝາຍສະ ຫັດສະວັດ ການພັດທະນາ ໃນທ້າຍປີ 2015 ແລະ ຫລຸດພົ້ນ ຈາກຄວາມດ້ອຍພັດທະນາໃນປີ 2020.
ທ່ານ ເມກ ພັນລັກ ກ່າວຕື່ມວ່າ: ເຖິງຈະບໍ່ມີຕົວແບບຂອງການພັດທະນາ ທີ່ແທດເໝາະກັບທຸກໂຄງການພັດທະນາໂດຍຊຸມຊົນ ແລະ ການປັບປຸງ ຊີວິດການເປັນຢູ່ກໍຕາມ ຕົນເຊື່ອໝັ້ນວ່າ ການສຳມະນາຄັ້ງນີ້ ຈະເປັນວິທະຍາສາດສຳຄັນ ເພື່ອຮ່ວມກັນປຶກສາຫາລື ກ່ຽວກັບພຶດຕິກຳຕົວຈິງທີ່ດີ ແລະ ບົດ ຮຽນທີ່ສາມາດ ທອດຖອນໄດ້, ທັງເປັນວິທີການຖ່າຍທອດ, ນຳໃຊ້ ແລະ ຂະຫຍາຍອອກສູ່ວົງກວ້າງ. ເມື່ອທ້າຍປີຜ່ານມາ ຄະນະຜູ້ແທນລາວ ກໍໄດ້ເຂົ້າຮ່ວມ ຢ້ຽມຢາມໂຄງການພັດທະນາຊຸມຊົນ ຢູ່ປະເທດອິນເດຍ ສັງເກດເຫັນວ່າ: ລາວ ແລະ ຫວຽດນາມ ມີຄວາມສົນໃຈຫລາຍ ຕໍ່ຜົນງານທີ່ຍາດມາໄດ້ ຈາກການນຳໃຊ້ວິທີການນີ້ ໂດຍປະຊາຊົນ ສາມາດນຳພາຕົນເອງ ຫລຸດພົ້ນອອກຈາກຄວາມທຸກຍາກ. ພ້ອມນັ້ນ ຍັງສັງເກດເຫັນວ່າ: ແມ່ຍິງໄດ້ມີການ ຊ່ວຍເຫລືອ ເຊິ່ງກັນ ແລະ ກັນ ອັນເປັນຄວາມພູມໃຈໃນຜົນສຳເລັດທີ່ໄດ້ມາ ພາຍຫລັງທີ່ໄດ້ຮ່ວມກັນຕໍ່ສູ້ ກັບ ຄວາມທຸກຍາກໃນໄລຍະຜ່ານມາ.
ທ່ານ ເມກ ພັນລັກ ຍັງຢ້ຳຕື່ມອີກວ່າ: ການສຳມະນາເປັນເວລາສອງວັນນີ້ ນອກຈາກເປັນ ການແລກ ປ່ຽນບົດຮຽນ ກັບບັນດາປະເທດໃກ້ຄຽງ ທີ່ມີ ສະພາບຄ້າຍຄືກັນແລ້ວ ຍັງຈະສ້າງເງື່ອນໄຂໃນການສືບຕໍ່ປຶກ ສາຫາລືກັນ ກ້າວໄປເຖິງການຈັດຕັ້ງປະຕິບັດໃຫ້ເປັນຮູບປະທຳ ໃນອະນາຄົດ./.
ກັບສາລະບານ
